Joriy yilning 30-sentabr kuni O’zbekiston Respublikasi Moliya vazirligi huzuridagi O’quv markazining “Buxgalteriya hisobi va axborot texnologiyalari” kafedrasi hamda vazirlikning Axborot hisoblash markazi bilan hamkorlikda “UzASBO dasturiy majmuasiga kiritilgan o’zgartirishlar, yangiliklar hamda dasturni takomillashtirish masalalari” mavzusida onlayn seminar tashkil etildi.
Mazkur onlayn seminarda Axborot hisoblash markazi xodimlari,
“Buxgalteriya hisobi va axborot texnologiyalari” kafedrasi professor-o‘qituvchilari, tuman (shahar) Moliya bo‘limlarining Budjet ijrosi va hisobi sho‘basi bosh iqtisodchilari hamda Davlat moliyaviy nazorat departamenti xodimlari ishtirok etdi.
Axborot hisoblash markazi xodimlari seminar ishtirokchilariga, budjet tashkilotlari hamda tovar (ish, xizmat) yetkazib beruvchilar bilan o‘zaro hisob kitob qilishlari uchun “UzASBO Faktura” elektron hujjat almashish tizimi (http://invoie.uzasbo.uz) ishlab chiqilganini va joriy yilning 17 sentyabridan boshlab test (sinov) tarzda ishlayotganini, 1 oktyabrdan boshlab esa real vaqt rejimida ishga tushirilishi rejalashtirilganini ma'lum qilishdi. Shuningdek, mazkur tizim
Davlat Soliq qo‘mitasining rasmiy operatori sifatida ro‘yxatdan o‘tganligini ham ta'kidlab o‘tishdi. Endilikda mazkur tizim orqali budjet tashkilotlari tovar (ish, xizmat) yetkazib beruvchilar bilan qog‘oz shaklda rasmiylashtirilgan hisobvaraq-fakturalardan voz kechib, hisob-kitoblarni faqatgina elektron tartibda shakllantirilgan hisobvaraq-fakturalar bo‘yicha amalga oshirish uchun mazkur tizimdan hech qanday ortiqcha to‘lovlarsiz foydalanishlari mumkin bo‘ladi.
Bundan tashqari, g‘aznachilik bo‘linmalari, moliya organlari, davlat va boshqa maqsadli jamg‘armalarini taqsimlovchi organlar, barcha budjet tashkilotlari 2021 yildan Yagona schyotlar rejasi asosida buxgalteriya hisobini yuritishi rejalashtirilgani, bu bo‘yicha UzASBO va DMBAT dasturiy majmualariga tegishli o‘zgartirishlar kiritilayotganligi yuzasidan batafsil ma’lumotlar berildi.
Onlayn seminar savol-javob shaklida juda qiziqarli va sermazmun o‘tdi. Mutaxassislar seminar ishtirokchilaridan tushgan savollarga to‘laqonli javob berdilar.
