Oʻzbekiston Respublikasi Vazirlar Mahkamasining 2025-yil 8-apreldagi “2025–2030-yillarda Oʻzbekiston Respublikasi davlat moliyasini boshqarish tizimini takomillashtirish strategiyasini tasdiqlash toʻgʻrisida”gi 210-sonli qarorida dasturiy budjetlashtirish tizimini joriy etish jarayonida vazirlik va idoralar xodimlarining institutsional salohiyatini oshirish maqsadida muntazam oʻquv tadbirlarini oʻtkazib borish vazifasi belgilangan. Mazkur vazifalar ijrosi doirasida 2025-yil 10–12-dekabr kunlari Toshkent shahrida “Oʻzbekiston Respublikasida natijaga yoʻnaltirilgan budjetlashtirish tizimini joriy etish” mavzusida 3 kunlik trening oʻtkazildi. Treningdan koʻzlangan asosiy maqsad - dasturiy budjetlashtirishni amaliyotga tatbiq etish boʻyicha yagona tushuncha va yondashuvlarni shakllantirish, budjet dasturlarining natijadorligini baholash hamda genderga yoʻnaltirilgan budjetlashtirishni joriy etishda maqsadli indikatorlarini ishlab chiqish boʻyicha amaliy koʻnikmalarni mustahkamlashdan iborat boʻldi.
Tadbirda vazirlik va idoralarning strategiya, budjet dasturlarini shakllantirish, monitoring va ichki audit yoʻnalishlari uchun masʼul bo‘lgan mutaxassislari ishtirok etdi. Trening mashgʻulotlari xalqaro ekspertlar Tatyana Vinogradova, Dildora Tadjibayeva hamda Rustam Muxamedjanov tomonidan olib borildi. Shuningdek, Iqtisodiyot va moliya vazirligi huzuridagi Oʻquv markazidan Sh.Mirzaxidova va B.Ilhomov ham trener sifatida ishtirok etdilar.
Oʻquv jarayoni davomida ishtirokchilar amaliyotga yoʻnaltirilgan formatda budjet dasturlarini tuzish, maqsad va natijalar zanjirini shakllantirish, steykxolderlar tahlili, xavflarni baholash (PESTEL), indikatorlarni SMART mezonlari asosida tayyorlash, rahbarlar uchun asosiy koʻrsatkichlar (“dashboard”) ko‘rinishlarini ishlab chiqish, shuningdek ichki auditda natijaga yoʻnaltirilgan yondashuvlarni qoʻllash boʻyicha amaliy keys topshiriqlar ustida ish olib bordilar.
Trening nazariy tushunchalar, guruhlarda ishlash, interaktiv muhokama va savol-javoblar asosida oʻtkazilib, ishtirokchilarning amaliy faoliyatlarida uchrayotgan savollarga ekspertlar tomonidan batafsil tushuntirishlar berildi.
