Oʻzbekiston Respublikasi Moliya vazirligi Davlat budjeti departamenti, Moliya vazirligi huzuridagi Oʻquv markazi va Budjet-soliq tadqiqotlari instituti hamkorligida Respublikamizdagi oliy taʼlim muassasalari talabalari bilan tashabbusli budjetlashtirish jarayoni va Moliya vazirligining “Yoshlar - yuqori marralar” platformasida yoshlar uchun yaratilgan imkoniyatlar va amalga oshirilayotgan tadbirlar boʻyicha tashkil etilayotgan amaliy seminarlar davomli tashkil etilmoqda.
Joriy yilning 5-aprel kuni Oʻzbekiston Respublikasi Moliya vazirligi huzuridagi Oʻquv markazi direktori I.Xamidova, professor-oʻqituvchilaridan Sh.Mirzahidova, Oʻzbekiston Respublikasi Moliya vazirligi Davlat budjeti departamenti bosh mutaxassisi X.Xamidov va Byudjet-soliq tadqiqotlari instituti xodimlari ishtirokida Toshkent moliya instituti talabalari uchun tashabbusli budjetlashtirish jarayonida hamda “Yoshlar-yuqori marralar” platformasi doirasidagi tadbirlarda talabalar faolligini oshirishga qaratilgan navbatdagi amaliy seminar oʻtkazildi.
Amaliy seminarda Oʻzbekiston Respublikasi Prezidentining 2021-yil 13-apreldagi PQ–5072-son “Budjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi Qarori asosida tashkil etilayotgan tashabbusli budjetlashtirish jarayonining amalga oshirish mexanizmi va fuqarolarning budjet jarayonidagi ishtiroki masalalari keng yoritilib, “Open budget” axborot portali orqali fuqarolar tomonidan kiritilgan loyiha takliflari tahlil qilindi. Amaliy seminarda Moliya vazirligining “Yoshlar-yuqori marralar” platformasi va tashabbusli budjetlashtirish jarayonida faol ishtirok etan talabalarni ragʻbatlantirish maqsadida joriy etilgan “Tashabbuskor byudjet elchisi” tanlovi boʻyicha ham maʼlumotlar berilib, mazkur tadbirlarda faol ishtirok etgan talabalarning moddiy ragʻbatlantirilishi qayd etildi.
Oʻzaro manfaatli shaklda tashkil etilgan mazkur amaliy seminar talaba yoshlar bilan qizgʻin savol javoblarga boy va ochiq davra suhbati shaklida boʻlib oʻtdi. Talaba yoshlar tomonidan tashabbusli budjetlashtirish portaliga kiritilgan oʻz loyihalarini keyingi bosqichlarda muvaffaqiyatli ilgari surish, gʻolib boʻlgan takliflarni moliyalashtirish va ularni jamoatchilik asosida nazoratini amalga oshirish masalalari yuzasidan berilgan savollarga mutaxassislar tomonidan asosli javoblar berildi.
