O‘zbekiston Respublikasi Prezidentining 2020-yil 20-oktabrdagi PF-6084-son Farmoni bilan tasdiqlangan “2020–2030-yillarda o‘zbek tilini rivojlantirish va til siyosatini takomillashtirish Konsepsiyasi”da o‘zbek tilini siyosiy-huquqiy, ijtimoiy-iqtisodiy, ma’naviy-ma’rifiy va boshqa sohalarda qo‘llash doirasini kengaytirish, undan davlat tili sifatida to‘liq va to‘g‘ri foydalanishni ta’minlash maqsadida barcha vazirlik va idoralar tarkibida ish yuritish, shuningdek, barcha idoralararo hujjatlar aylanishi davlat tilida bo‘lishini to‘liq ta’minlash va bu jarayonda adabiy til me’yorlariga qat’iy amal qilishni nazorat qilish, davlat tilini rivojlantirishga doir ilmiy-amaliy anjumanlar tashkil etish belgilangan.
Mazkur Farmon ijrosini tizimli ta’minlash maqsadida O‘zbekiston Respublikasi Moliya vazirligi tomonidan “Yoshlarni qo‘llab-quvvatlash va aholi salomatligini mustahkamlash yili”da moliya tizimida davlat tilini to‘laqonli joriy etish, ish yuritish va hujjatlar aylanishi davlat tilida bo‘lishini ta’minlash yuzasidan qator tadbirlarni amalga oshirib kelmoqda.
Shu munosabat bilan vazirlik tizimida faoliyat ko‘rsatayotgan (moliya, g‘azna, pensiya organlari) mutaxassis xodimlar uchun joriy yilning 27-sentabr kuni “Davlat tilida ish yuritish sohasida kadrlar salohiyatini oshirish – davr talabi” mavzusida seminar-trening o‘tkazildi.
Mazkur seminar Moliya vazirligi huzuridagi O‘quv markazi tomonidan tashkil qilindi. Tadbirda Moliya vaziri maslahatchisi Dilshod Bo‘riyev kirish so‘zi bilan ishtirok etdi.
Shuningdek, tadbir davomida O‘zbekiston Respublikasi Adliya vazirligining yetakchi maslahatchi mutaxassisi Jamshid Toshev hamda Alisher Navoiy nomidagi Toshkent davlat o‘zbek tili va adabiyoti universitetining dotsenti, pedagogika fanlari nomzodi Yusupova Tursunoy Axmedovna o‘zlarining ma’ruzalari bilan ishtirok etdilar. Seminar ishtirokchilariga davlat tilida ish yuritishda imlo qoidalari va ulardan foydalanish bo‘yicha tavsiyalar, davlat organlari va tashkilotlarida normativ-huquqiy hujjatlarni davlat tilida yuritish masalalari keng yoritib berildi.
Ushbu seminarda Moliya vazirligining hududiy tarkibiy bo‘linmalari rahbarlari ham onlayn tarzda ishtirok etib, ko‘tarilgan masalalar muhokamasi jarayonida faol qatnashdilar. Shuningdek, moliya tizimi mutaxassislari o‘zbek tilida ish yuritish sohasidagi o‘zlarining qiziqtirgan savol va takliflariga javob oldilar.
Tadbir yakunida ishtirokchilar tashkil etilgan seminarning ko‘tarinki ruhda, qiziqarli va foydali o‘tganligini, kelgusida ham bu kabi tadbirlar Moliya vazirligida davlat tilini to‘laqonli joriy etishga hamda ish yuritish va hujjatlar aylanishi davlat tilida bo‘lishini ta’minlashga xizmat qilishini alohida ta’kidladilar.
