“KORRUPSIYA VA UNING OQIBATLARI” mavzusidagi
davra suhbatiga bag‘ishlangan
PRESS-RELIZ
2019-yilning 28-noyabr kuni O‘zbekiston Respublikasi Moliya vazirligi huzuridagi O‘quv markazi forumlar zalida “Korrupsiya va uning oqibatlari” mavzusidagi davra suhbati o‘tkazildi.
Mazkur davra suhbati O‘zbekiston Respublikasi Moliya vazirligining 2019- yil 5-iyuldagi 106-son buyrug‘i hamda O‘zbekiston Respublikasi Moliya vazirligi huzuridagi O‘quv markazi tomonidan 2019-2020-yillarga mo‘ljallangan korrupsiyaning oldini olishga doir chora-tadbirlar rejasi ijrosini ta’minlash bo‘yicha tashkil etilgan.
Davra suhbatini tashkil etishdan ko‘zlangan asosiy maqsad O‘zbekiston Respublikasi Prezidentining 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi PF-5729-son Farmonini samarali ijrosini ta’minlash, tizimida korrupsiyaga qarshi kurashish sohasida olib borilayotgan islohotlar samaradorligini oshirish, korrupsiya holatlarini aniqlash, oldini olish va bartaraf etish borasida amalga oshirilayotgan chora-tadbirlar to‘g‘risida fikr almashishdan iborat.
Tadbirda O‘zbekiston Respublikasi Moliya vazirligi huzuridagi O‘quv markazi direktori o‘rinbosari Umid Nazarov, O‘zbekiston Respublikasi IIV Akademiyasi “Kriminalogiya” kafedrasi dotsenti, polkovnik Sharif Qobilov hamda O‘zbekiston Respublikasi Davlat moliyaviy nazorati departamenti bo‘lim boshlig‘i o‘rinbosari, korrupsiyaga qarshi kurashish bo‘yicha idoraviy muvofiqlashtiruvchi Alisher Nasreddinov o‘z ma’ruzalari bilan ishtirok etdilar. Davra suhbatida:
- Korrupsiya: kelib chiqish sabablari, shart-sharoitlari va oldini olish yo‘llari;
- Moliya vazirligi tomonidan korrupsiyaning oldini olish bo‘yicha amalga oshirilgan chora-tadbirlar muhokama etildi.
Bo‘lib o‘tgan bahs-munozaralar natijalari yuzasidan tizimda korrupsiya bilan bog‘liq qonunbuzarlik holatlarini aniqlash, ularning oldini olish va bartaraf etishda moliya organlari xodimlari, ayniqsa, yosh kadrlarning mas’uliyatini oshirishga doir masalalarga qaratilgan amaliy taklif-tavsiyalar ishlab chiqildi.
Mazkur davra suhbati tinglovchilarga korrupsiyaning ijtimoiy va iqtisodiy xavfli holati bo‘yicha bilimlarini oshirishga, huquqiy ongi va zamonaviy dunyoqarashini kengaytirishga, shu yo‘l bilan yurt taraqqiyoti hamda aholimizning turmush farovonligini yanada oshirishga hissa qo‘shadigan malakali kadrlar bo‘lib yetishishlariga xizmat qiladi.
Umuman olganda, mazkur davra suhbatida Moliya vazirligi huzuridagi O‘quv markaziga malaka oshirishga kelgan – Davlat moliyaviy nazorati hududiy boshqarmalariga rahbarlik lavozimlariga zaxiraga olingan xodimlar, Moliya bosh boshqarmasining va G‘aznachilik bo‘linmalari xodimlari hamda Maktabgacha ta’lim vazirligi Ichki audit va moliyaviy nazorat xizmati xodimlari ishtirok etib, o‘zaro fikr almashishga muvaffaq bo‘ldilar.
