O‘zbekiston Respublikasi Moliya vazirligi huzuridagi O‘quv markazi
va Moliya vazirligi Davlat budjeti departamenti hamkorligida
“Budjet tashkilotlarida budjet hisobining standartlariga muvofiq buxgalteriya hisobining yuritilishi va moliyaviy hisobotlarni tuzish tartibi” mavzusida onlayn seminar bo‘lib o‘tdi
Joriy yilning 29-sentabr kuni O‘zbekiston Respublikasi Moliya vazirligi huzuridagi O‘quv markazining “Buxgalteriya hisobi va axborot texnologiyalari” kafedrasi hamda vazirlikning Davlat budjeti departamenti bilan hamkorlikda “Budjet tashkilotlarida budjet hisobining standartlariga muvofiq buxgalteriya hisobining yuritilishi va moliyaviy hisobotlarni tuzish tartibi” mavzusida onlayn seminar bo‘lib o‘tdi.
Mazkur onlayn seminarda Davlat budjeti departamenti bo‘lim boshlig‘i Bekzod Narzullayev, bosh iqtisodchi Aynura Bakaybayeva, O‘quv markazi direktori Iroda Hamidova, “Buxgalteriya hisobi va axborot texnologiyalari” kafedrasi professor-o‘qituvchilari, tuman (shahar) Moliya bo‘limlarining Budjet ijrosi va hisobi sho‘basi bosh iqtisodchilari hamda Davlat moliyaviy nazorat departamenti xodimlari ishtirok etdi.
Bekzod Narzullayev tomonidan seminar ishtirokchilariga budjet hisobining standartlari amaliyotga joriy qilinayotganligi, g‘aznachilik bo‘linmalari, moliya organlari, davlat va boshqa maqsadli jamg‘armalarini taqsimlovchi organlari, barcha budjet tashkilotlari 2021-yildan Yagona schyotlar rejasi asosida buxgalteriya hisobini yuritishi rejalashtirilgani, bu bo‘yicha UzASBO va DMBAT dasturiy majmualariga tegishli o‘zgartirishlar kiritilayotganligi yuzasidan batafsil ma’lumotlar berildi. Shuningdek, budjet hisobotlarini xalqaro standartlari va talablari asosida shakllantirish bo‘yicha amalga oshirilayotgan tizimli ishlar to‘g‘risida ma’lumotlar berildi.
Onlayn seminar savol-javob shaklida qiziqarli va sermazmun o‘tdi. Mutaxassislar seminar ishtirokchilaridan tushgan savollarga to‘laqonli javob berdilar.
