Iqtisodiyot va moliya vazirligi huzuridagi O‘quv markazida O‘zbekiston Respublikasi “Manfaatlar to‘qnashuvi to‘g‘risida”gi Qonunning mazmun-mohiyatiga bag‘ishlangan davra suhbati bo‘lib o‘tdi.

Mazkur davra suhbati Iqtisodiyot va moliya vazirligi bilan hamkorlikda tashkil etilgan bo‘lib, unda O‘quv markazining xodimlari hamda vazirlikning hududiy iqtisodiyot va moliya bosh boshqarmalari, tuman (shahar) iqtisodiyot va moliya bo‘limlari, vazirlik huzuridagi G‘aznachilik xizmati qo‘mitasi hududiy bo‘linmalari hamda vazirlik huzuridagi budjetdan tashqari Pensiya jamg‘armasi hududiy boshqarmalari, tuman (shahar) bo‘limlaridan kelgan tinglovchilar ishtirok etdi.

      O‘quv markazi direktori I. Xamidova mazkur Qonunning mazmun-mohiyati haqida so‘z yuritar ekan, avvalo, vazirlik tizimida ochiqlik va shaffoflikni ta’minlash, manfaatlar to‘qnashuvi bilan bog‘liq munosabatlarning har qanday ko‘rinishiga qat’iy chek qo‘yish olib borilayotgan izchil islohotlarning asosiy yo‘nalishi ekanini ta’kidladi.

      Davra suhbatida Iqtisodiyot va moliya vazirligining Yuridik departamenti bosh yuriskonsulti B. Bobokeldiyev tomonidan Qonunning mazmun-mohiyati, ya’ni “manfaatlar to‘qnashuvi” tushunchasi, manfaatlar to‘qnashuvi kimlar o‘rtasida va qachon vujudga kelishi yuzasidan batafsil tushuntirishlar berildi, shuningdek, vazirlikning Korrupsiyaga qarshi kurashish va komplayens nazorati bo‘limi bosh mutaxassisi O. Samadov vazirlik tizimida Qonun ijrosini samarali tashkil etish bo‘yicha amalga oshiriladigan chora-tadbirlar ko‘rsatib o‘tildi.

      Davra suhbati ishtirokchilari “Manfaatlar toʻqnashuvi toʻgʻrisida”gi Qonunning mohiyati, davlat xizmatchilari faoliyatidagi manfaatlar toʻqnashuvi, manfaatlar to‘qnashuvini tartibga solish bo‘yicha ko‘rilgan choralar hamda ushbu qonunni buzganlik uchun belgilangan javobgarlik boʻyicha oʻzlarini qiziqtirgan savollarga mutaxassislardan asoslantirilgan javoblar olishdi hamda mavzular doirasida fikr almashishdi.