O'zbekiston Respublikasi Prezidentining 2019 yil 13 maydagi PF-5715-sonli "Ipoteka kreditlari bozorini rivojlantirish va kengaytirish bo'yicha qo'shimcha chora-tadbirlar to'g'risida" gi farmoni normalarini o'z vaqtida va sifatli bajarilishini ta'minlash maqsadida, Moliya vazirligi tomonidan 2019 yil 27 sentyabr kuni Osiyo taraqqiyot banki maslahatchilari ishtirokida xususiy qurilish kompaniyalari bilan uchrashuv bo'lib o'tdi. 

Uchrashuv davomida ishtirokchilar ko'p xonadonli uylarni qurish masalasi va bu qurulishlarni ipoteka kreditlash mexanizmlari orqali amalga oshirish kabi dolzarb masalalarini muhokama qildilar. OTBning xalqaro maslahatchisi aholi uchun uy-joy qurilishlari haqida xorijiy tajribasi, xususiy qurilish kompaniyalari uy-joy qurish va sotishning asosiy mexanizmlari haqida ma’lumotlar berib o'tdi. Shuningdek, uy-joy qurish va sotish jarayonlarini tartibga soluvchi aniq huquqiy mexanizmlar, shu jumladan qurilish standartlarini qayta ko'rib chiqish zarurligini taklif qildi.

Xususiy tashkilotlar uy-joy qurilishi davlat dasturini amalga oshirishdagi ishtiroki, ipoteka kreditlash mexanizmlaridan foydalanish amaliyotini kengaytirish, shuningdek, aholining ijtimoiy himoyaga muhtoj qatlamlari tomonidan uy-joy sotib olish uchun subsidiya tizimini joriy qilish masalalari yuzasidan fikr almashildi.

Shuningdek, uy-joy narxining shakllanishiga ta'sir qiluvchi omillarga alohida e’tibor qaratildi.

Bundan tashqari, turar-joy binosini foydalanishga topshirish paytida xususiy qurilish tashkilotlari duch keladigan huquqiy muammolar ham muhokama qilindi.

Yig'ilishda Moliya vazirligi, "Murad Buildings" MChJ, "Golden House" MChJ, "Olmos qurilish invest" MChJ, "Novastroy" MChJ vakillari ishtirok etdilar.

Majlis yakunida tegishli xulosalar qabul qilindi.

Manba: Mf.uz