Moliya vazirligi markaziy apparati hamda Moliya vazirligi huzuridagi
O‘quv markazi hamkorligida nazm va navo kechasi o‘tkazildi

12-fevral kuni O‘zbekiston Respublikasi Moliya vazirligi markaziy apparati hamda Moliya vazirligi huzuridagi O‘quv markazi hamkorligida
mutafakkir shoir Alisher Navoiy tavalludining 580 hamda shoh va shoir Zahiriddin Muhammad Bobur tavalludining 538 yilligiga bag‘ishlangan nazm va navo kechasi bo‘lib o‘tdi. Unda vazirlik markaziy apparati va O‘quv markazining barcha xodimlari, shuningdek videoaloqa orqali hududiy moliya organlari vakillari ham ishtirok etdi.

O‘tkazilgan tadbirda Moliya vazirining ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Dilshod Bo‘riyev, adabiyotshunos olim Suvon Meli so‘zga chiqib, ikki buyuk ajdodimizning o‘zbek tili va adabiyoti rivojiga qo‘shgan hissalari, ular qoldirgan boy ma’naviy meros xususida so‘zlab, ishtirokchilarga ikki buyuk adiblar xuxusidagi ma’lum bo‘lmagan yangi ma’lumotlar va faktlar bilan o‘rtoqlashdilar.

Shuningdek, tadbirga tashrif buyurgan mehmonlardan O‘zbekistonda xizmat ko‘rsatgan artist Behzod Muhammadkarimov va “Shuhrat” medali sohibasi Dilnoza Kubayeva “Navoiy” spektaklidagi “Alisher va Guli” obrazlaridan parcha ijro etib, tadbir ishtirokchilarini yanada xushnud aylashdi.

Nazm va navo kechasida O‘zbekiston davlat filarmoniyasi sozandalari tomonidan milliy kuylar, O‘zbekiston xalq hofizi Orolmirzo Safarovning Navoiy va Bobur g‘azallar asosida tayyorlagan qo‘shiqlari yangradi.

Tadbir yig‘ilganlarda katta taassurot qoldirdi.