Joriy yilning 11-fevral kuni Moliya vazirligida Jahon sog'liqni saqlash tashkilotining (JSST) Yevropa mintaqaviy byurosining yangi direktori Xans Klyuge bilan uchrashuv bo'lib o'tdi.
Ma`lumot uchun: Xans Klyuge 2019 yil 17 sentyabrda Kopengagen shahrida bo'lib o'tgan 69-sessiyasida Jahon sog'liqni saqlash tashkilotining Yevropa mintaqaviy byurosining direktori etib saylangan. Joriy yilning 1-fevral kuni lavozimga tayinlanganidan so'ng, uning birinchi chet elga rasmiy tashrifi O'zbekistondan boshlandi. Saylanishidan oldin Xans Klyuge JSSTning Yevropa mintaqaviy byurosida sog'liqni saqlash tizimlari va sog'liqni saqlash bo'limini boshqargan. Bundan tashqari, u silning oldini olish va nazorat qilish byurosi direktorining maxsus vakili bo'lgan.
JSST YMB - Jahon sog'liqni saqlash tashkilotining oltita mintaqaviy vakolatxonalaridan biri bo'lib, 53 mamlakat, shu jumladan O'zbekistonni o'z ichiga oladi.
Uchrashuv boshida Xans Klyuge O'zbekiston Respublikasida so'nggi yillarda amalga oshirilgan keng ko'lamli islohotlar dasturini yuqori baholadi. Xususan, sog'liqni saqlash va tibbiyot muassasalari infratuzilmasini rivojlantirish, shuningdek, kadrlar tayyorlash sohasidagi o'zgarishlarni qayd etdi.
Shuningdek, uchrashuv doirasida O'zbekiston bilan Jahon sog'liqni saqlash tashkiloti o'rtasida og'ir kasalliklarning oldini olish, tibbiy ta'lim va fan sohasidagi hamkorlikni rivojlantirish istiqbollari muhokama qilindi.
