O‘zbekiston Respublikasida uzluksiz ta’limning noyob tizimi yaratilgan bo‘lib, ilmiy-tadqiqot faoliyati, oliy malakali ilmiy va ilmiy-pedagog kadrlar tayyorlash va attestatsiyadan o‘tkazish samaradorligini oshirishga, mamlakatning ijtimoiy va iqtisodiy taraqqiyotida ilm-fanning rolini kuchaytirishga yo‘naltirilgan salmoqli ishlar amalga oshirib kelinmoqda.
Ayniqsa, ilm-fanning rolini va ilmiy salohiyatni oshirishda Ilmiy unvonlar berish tartibi to‘g‘risidagi Nizom (ro‘yxat raqami 2793, 2016 yil 3 iyun) muhim ahamiyat kasb etadi va u ilmiy unvonlar berish tartibini belgilaydi.
Dotsent ilmiy unvoni ta’lim muassasalarida samarali ilmiy-pedagogik va ilmiy faoliyat olib borayotgan, fanning muayyan sohasida chuqur kasbiy bilim hamda o‘z sohasida muayyan yutuqlarga erishgan yuksak ma’naviyatli shaxslarga beriladi.
Bu borada Iqtisodiyot va moliya vazirligi huzuridagi Moliya organlari hamda budjet tashkilotlarining moliya-hisob bo‘linmalari xodimlarini tayyorlash va qayta tayyorlash O‘quv markazida muhim tarixiy qadam tashlandi. O‘quv markazida ilmiy unvonlarga tavsiya etish amaliyoti yo‘lga qo‘yilib, ilk bora O‘quv markazi Kengashining qaroriga muvofiq “Davlat moliyasi” kafedrasi o‘qituvchisi Ilxomov Baxodir Ilxom o‘g‘li 08.00.07 - Moliya, pul muomalasi va kredit ixtisosligi bo‘yicha va “Buxgalteriya hisobi va axborot texnologiyalari” kafedrasi mudiri Qurbonov Shodlikbek Marksovich 08.00.08 – Buxgalteriya hisobi, audit va iqtisodiy tahlil ixtisosligi bo‘yicha dotsent ilmiy unvonlariga tavsiya etildi va mazkur qaror O‘zbekiston Respublikasi Oliy attestatsiya komissiyasi tomonidan tasdiqlanib ularga dotsent ilmiy unvoni berildi.
Zero, ushbu voqea O‘zbekiston Respublikasi Oliy attestatsiya komissiyasi tomonidan O‘quv markazi mutaxassislarining ilmiy salohiyati, izlanishlari, innovatsion yondashuvlari hamda ta’lim jarayonida ko‘rsatayotgan amaliy natijalarini tan olish va e’tirof etish hisoblanadi.
Erishilgan mazkur yutuqlar ilmiy salohiyatni yanada yuksaltirish bilan birga vazirlik tizimi mutaxassislarining ilmiy ishlarini rag‘batlantirish hamda bevosita amaliyot bilan uzviy bog‘liq bo‘lgan malakali mutaxassislarni ilmiy-pedagogik va ilmiy-tadqiqot faoliyatiga keng jalb etish yo‘lidagi muhim imkoniyatlardan biri sifatida tahsinga sazovordir.
Hamkasblarimiz Baxodir Ilxomov va Shodlikbek Qurbonovlarni dotsent ilmiy unvonlari bilan samimiy tabriklaymiz va kelgusi faoliyatlarida muvaffaqiyatlar tilaymiz! Albatta, kelgusida ularning vazirlik tizimida ilm-fanning salohiyatini yuksaltirishda, ilmiy ishlanmalarning amaliyotga joriy etilishida xizmatlari beqiyos bo‘lishiga ishonchimiz komil.
