Ekologiya va atrof muhitni muhofaza qilish qo‘mitasi va uning tizimidagi budjet tashkilotlari hamda hududiy "Toza hudud" DUKlarida 2017-2020 yillarda budjetdan ajratilgan va budjetdan tashqari mablag‘larning maqsadli sarflanishi yuzasidan o‘tkazilgan tekshirishlarda jami 87,3 mlrd.so‘mlik moliyaviy xato va kamchiliklar aniqlangan.
Jumladan, Ekologiya va atrof muhitni muhofaza qilish qo‘mitasi va uning tizimidagi budjet tashkilotlarida xodimlarga ish haqi, mehnat ta’tili, moddiy yordam va mukofot pullarini hisoblashda xatoliklarga yo‘l qo‘yilishi oqibatida 9,4 mlrd.so‘m miqdoridagi budjet va budjetdan tashqari jamg‘armasi mablag‘lari noqonuniy sarflab yuborilgan.
Misol uchun, ekologiya, atrof tabiiy muhitni muhofaza qilish va chiqindilar bilan bog‘liq ishlarni amalga oshirish jamg‘armasiga ajratiladigan tushumlarni, atrof tabiiy muhit ifloslantirilganligi va chiqindilar joylashtirilganligi uchun kompensatsiya to‘lovlarini hamda bioxilma-xillik yuzasidan tabiatga etkazilgan zarar uchun tegishli tashkilotlardan 3,8 mlrd.so‘m undirilishi ta’minlanmagan bo‘lsa, budjet va budjetdan tashqari mablag‘lar hisobidan 2,2 mlrd.so‘m boshqa xarajatlarga ortiqcha va maqsadsiz sarflab yuborilgan.
Bundan tashqari, Ekologiya va atrof muhitni muhofaza qilish qo‘mitasi tizimidagi hududiy “Toza hudud” DUKlarga ajratilgan budjet va budjetdan tashqari mablag‘larni maqsadli sarflanishida, ish haqi va unga tenglashtirilgan to‘lovlarni to‘lashda, maxsus texnikalar va chiqindi konteynerlarini xarid qilishda hamda chiqindi poligonlarini qurilishida 77,9 mlrd.so‘mlik qonunbuzilish holatlari aniqlangan.
Misol uchun, Andijon viloyati “Toza hudud” DUK hisobchisi o‘ziga tegishli bank kartasiga 282,7 mln..so‘m mablag‘ni asossiz o‘tkazib, o‘zlashtirib yuborgan bo‘lsa, Qashqadaryo viloyati “Toza hudud” DUKda xodimlarning oylik ish haqi miqdori asossiz ravishda yuqori qo‘llanilishi hisobiga ishchi-xodimlarga ish haqi va unga tenglashtirilgan to‘lovlardan 1 730,4 mln..so‘m ortiqcha to‘lab yuborilgan.
Shu kabi holatlarga Navoiy (1 561,7 mln..so‘m), Samarqand (776,4 mln..so‘m), Surxondaryo (262,1 mln..so‘m), Jizzax (173 mln..so‘m), Xorazm (101,6 mln..so‘m), Sirdaryo (50,5 mln..so‘m) va Buxoro (29,6 mln..so‘m) viloyatlari hamda Qoraqalpog‘iston Respublikasi (236,3 mln..so‘m)dagi hududiy “Toza hudud” DUKlarida ham yo‘l qo‘yilgan.
Hududiy “Toza hudud” DUKlarida maxsus transport vositalaridan maqsadli foydalanilishida va yoqilg‘i moylash mahsulotlarini sarflash me’yorlariga amal qilinmaganligi natijasida 44,2 mlrd.so‘m miqdorida mablag‘lar asossiz ortiqcha sarflangan.
Misol uchun, maishiy chiqindi yig‘ish poligonlarida yordamchi bino, avtogaraj, ma’muriy binolar va inshoatlar qurilishida pudratchilar tomonidan bajarilmagan qurilish-ta’mirlash ishlarini hisobotlarga qo‘shib yozilishi oqibatida Toshkent (695 mln..so‘m), Sirdaryo (587,5 mln..so‘m), Navoiy (201,6 mln..so‘m), Andijon (104,8 mln..so‘m), Jizzax (91 mln..so‘m), Farg‘ona (36 mln..so‘m) va Xorazm (25 mln..so‘m) viloyatlarida mablag‘lar asossiz sarflab yuborilgan.
Shuningdek, Buvayda tuman hokimining qarori bilan 2020 yilda poligon uchun ajratilgan hududda 470 mln..so‘mga qurib bitkazilgan avtogaraj mazkur yilning noyabrь oyida asossiz buzib tashlanib, budjet mablag‘larini samarasiz sarflanishiga yo‘l qo‘yilgan.
Hududiy “Toza hudud” DUKlar tomonidan “Davlat xaridlari to‘g‘risida”gi Qonun talablariga rioya etilmasdan 11,3 mlrd.so‘mlik shartnomalar tuzilgan va xaridlar amalga oshirilgan.
Misol uchun, mazkur Qonun talablariga zid ravishda Samarqand (7,1 mlrd.so‘m), Buxoro (794,7 mln..so‘m) va Namangan (372,4 mln..so‘m) viloyatlarida to‘g‘ridan-to‘g‘ri tuzilgan shartnomalar asosida tovar-moddiy boyliklar xarid qilingan.
O‘tkazilgan nazorat tadbirlari natijasida rasmiylashtirilgan hujjatlar huquqiy baho berish uchun huquqni muhofaza qiluvchi organlarga yuborildi.
Moliya vazirligi
Axborot xizmati
