Joriy yilning 15-aprel kuni Iqtisodiyot va moliya vazirligi huzuridagi Oʻquv markazida “Gʻaznachilik tizimida amalga oshirilayotgan islohotlar, budjet mablagʻlarini boshqarishdagi gʻaznachilikning samarali jihatlari” mavzusida davra suhbati bo‘lib o‘tdi. Davra suhbati gʻaznachilik xizmati hududiy boshqarmalari, tuman va shahar bo‘limi mutaxassislari uchun Gʻaznachilik xizmati qoʻmitasi Moliyaviy majburiyatlar ijrosi boshqarmasi bosh mutaxassisi Qurbonov Alisher Allanazarovich tomonidan olib borildi.
Yangi Oʻzbekistonning barcha tarmoqlarida amalga oshirilayotgan islohot va oʻzgarishlar bevosita moliya tizimida, aynan gʻaznachilik xizmatidagi oʻzgarish va islohotlarga ham tegishlidir. Shu nuqtayi nazardan, malaka oshirayotgan mutaxassislarga tizimdagi amalga oshirib kelinayotgan islohotlarning maqsadi hamda erishilgan natijalar yuzasidan batafsil tushuntirishlar berildi. Bu islohotlar, avvalo, sohadagi kadrlar salohiyatini oshirish va bajariladigan ishlarni raqamlashtirish bilan bevosita bogʻliq.
Xususan, Oʻzbekiston Respublikasi Vazirlar Mahkamasining 2024-yil 25-yanvardagi 47-son “Budjetning birlamchi xarajatlarini qoplash uchun yagona gʻazna hisobvaragʻida saqlanishi lozim boʻlgan mablagʻlarning eng kam miqdorini aniqlash chora-tadbirlari toʻgʻrisida”gi qarori, Oʻzbekiston Respublikasi Prezidentining 2024-yil 10-iyuldagi PF-100-son “Budjet mablagʻlaridan foydalanish ustidan moliyaviy nazoratni kuchaytirish boʻyicha qoʻshimcha chora-tadbirlar toʻgʻrisida”gi Farmoni singari meʼyoriy-huquqiy hujjatlar budjet ijrosida samarali boshqaruvni va moliyaviy nazoratdagi risklarni aniqlash, oldini olish choralari kabi tizimli oʻzgarishlar amalga oshirilishiga asos bo‘ldi.
Respublika miqyosida gʻaznachilik xizmatida amalga oshirilayotgan tizimli oʻzgarishlar, belgilangan vazifalarni oʻz vaqtida va sifatli bajarish, ish jarayonida raqamlashtirish orqali inson omilini kamaytirish, istiqbolda rejalashtirilayotgan loyihalar toʻgʻrisidagi maʼlumotlar soha mutaxassislari uchun ahamiyatli boʻldi.
Hududlardagi gʻaznachilik xizmati mutaxassislarining budjet tizimi budjetlarining gʻazna ijrosi jarayonidagi rejalashtirish, kassa ijrosini taʼminlash va nazorat bosqichlari kabi amaliyotda ko‘p uchraydigan muammoli vaziyatlar va savollariga qoʻmita mutaxassisi tomonidan tushuntirishlar va misollar orqali javob berildi.
