2021-yilning 11-avgust kuni O‘zbekiston Respublikasi Moliya vazirligi Davlat budjeti departamenti hamda Moliya vazirligi huzuridagi O‘quv markazi tomonidan “Budjet jarayonidagi o‘zgarishlar” mavzusida onlayn davra suhbati tashkillashtirildi. Davra suhbati Moliya vazirligi Davlat budjeti departamenti bo‘lim boshlig‘i Artikov Baxtiyor Mahkamovich, Moliya vazirligi huzuridagi O‘quv markazi xodimlari hamda Tuman (shahar) Moliya bo‘limlarining Mahalliy budjetni shakllantirish va budjet tashkilotlarini moliyaviy ta’minlash bo‘limi boshlig‘i o‘rinbosarlari, Tuman (shahar) Moliya bo‘limlarining Qishloq xo‘jaligida bozor mexanizmlarini joriy etish va tomorqa yerlarini rivojlantirish sho‘basi mutaxassislari va Moliya bosh boshqarmasi Kommunal va yo‘l xo‘jaligi, obodonlashtirish va narxlarni shakllantirishni rivojlantirish tadbirlarini moliyaviy ta’minlash bo‘limi boshlig‘lari lavozimidagi tinglovchilar ishtirokida olib borildi.
Mazkur davra suhbati Moliya vazirligi huzuridagi O‘quv markazining faoliyatini takomillashtirish bo‘yicha 2021–2023-yillarga mo‘ljallangan strategiyasi ijrosini ta’minlash yuzasidan tashkil etilgan.
Davra suhbatini tashkil etishdan ko‘zlangan asosiy maqsad, budjet jarayonidagi islohotlarga oid jarayonlarni tinglovchilarga yanada kengroq yoritish, budjet jarayonini samarali ijrosini ta’minlash borasidagi ish faoliyatlarida samarali qo‘llash bo‘yicha ko‘nikma hosil qilish, budjet jarayoni yuzasidan olib borilayotgan islohotlar samaradorligini oshirish, xato va kamchiliklarni oldini olish borasida fikr almashishdan iborat.
Tadbirda bo‘lim boshlig‘i Artikov Baxtiyor Mahkamovich o‘z maruzalari bilan ishtirok etdilar. Davra suhbatida:
– O‘zbekiston Respublikasi Vazirlar Mahkamasining 2020-yil 24-avgustdagi 506-sonli “2020–2024-yillarda O‘zbekiston Respublikasi davlat moliyasini boshqarish tizimini takomillashtirish strategiyasini tasdiqlash to‘g‘risida”gi qarori bilan belgilangan vazifalar;
– O‘rta muddatli budjetni tayyorlash jarayoni bosqichlari, qadamma-qadam amalga oshirilgan ishlar bo‘yicha ma’lumotlar berildi.
Tinglovchilar tomonidan budjet so‘rovini avtomatlashtirilgan tarzda taqdim etish bilan bog‘lik qator savollarga javoblar berildi, o‘rta muddatli budjetni tayyorlash jarayonida va qadamma-qadam amalga oshirilgan ishlarda moliya organlari xodimlari, ayniqsa, yosh kadrlarning mas’uliyatini oshirishga doir masalalarga alohida to‘xtalib o‘tildi.
