Joriy yilning may oyidan boshlab 2023-yil 1-yanvarigacha barcha soliq to‘lovchilar-yuridik shaxslarga 25 yoshdan oshmagan shaxslarning mehnat haqi to‘lashga doir xarajatlari uchun to‘langan ijtimoiy soliq summasini qaytariladi, ya'ni Davlat budjeti tomonidan qoplanadi.
Normani qo‘llash shartlari:
- Soliq to‘lovchi byudjetga ijtimoiy soliqni to‘lashi shart.
- 25 yoshdan oshmagan shaxslar uchun to‘langan ijtimoiy soliq summasini qaytarish ishga kirganining 7-oyidan boshlab mehnat haqi to‘lashga doir xarajatlar bo‘yicha amalga oshiriladi. Ya'ni, dastlabki 6 oy uchun to‘langan ijtimoiy soliq, shu jumladan, bunday shaxslarni 6 oydan kam muddatga yollash hollarida, kompensasiya qilinmaydi.
- Hisobot davri oxirida to‘langan ijtimoiy soliq, murojaat qilingan kundan boshlab 15 kundan kechiktirmay budjetdan qaytariladi. Qaytarish bo‘yicha o‘zaro hamkorlik tartibi qo‘shimcha ravishda soliq to‘lovchilarga yetkaziladi.
- Joriy yilning may oyidan boshlab 2022-yil dekabriga qadar mehnat haqi to‘lashga doir xarajatlar bo‘yicha hisoblangan ijtimoiy soliq qoplanadi.
- Soliq to‘lovchi tomonidan budjetdan qoplanishi uchun e'lon qilingan (ko‘rsatilgan) ijtimoiy soliq summalari daromad solig‘ini hisoblashda xarajatlar tarkibida aks ettirilmaydi.
- Hisobot davrida xodim 25 yoshga to‘lganida, ijtimoiy soliq kompensasiya qilinmaydi.
Birgina istisno mavjud: yuqoridagi norma budjet tashkilotlari va davlat korxonalari, ustav fondida (ustav kapitalida) davlat ulushi 50 foiz va undan ko‘proq bo‘lgan yuridik shaxslarga nisbatan qo‘llanilmaydi.
Moliya vazirligi
Axborot xizmati
