Aholi, iqtisodiyot va biznesni yanada qo‘llab-quvvatlash maqsadida O‘zbekiston Respublikasi Prezidentining 2020-yil
20-iyuldagi PF-6029-son “Koronavirus pandemiyasining salbiy ta’sirini kamaytirish uchun aholi, tadbirkorlik subyektlari, umumiy ovqatlanish, savdo va xizmatlar sohasini qo‘llab-quvvatlashning qo‘shimcha chora-tadbirlari to‘g‘risida”gi Farmoni qabul qilindi.

Farmon bilan soliq yuklarini kamaytirish, soliq imtiyozlari muddatini uzaytirish, shuningdek ish o‘rinlari va malakali mutaxassislarni saqlab qolish maqsadida muddati 1-martdan tugaydigan alohida toifadagi mutaxassislar malaka sertifikatlarining amal qilish muddatini uzaytirish belgilandi. Mazkur norma auditor malaka sertifikatining amal qilish muddatini uzaytirishga ham taalluqlidir. Farmonga muvofiq vakolatli organlarga malaka sertifikatlarning amal qilish muddatini navbatdagi malakaviy imtihonlarni o‘tkazish sanasiga qadar uzaytirish vazifasi yuklatildi.

Shu munosabat bilan 2020-yil 1-martda malaka sertifikatlari amal qilish muddati tugaydigan auditorlar navbatdagi malaka imtihoni sanasiga qadar mavjud malaka sertifikati asosida belgilangan tartibda auditorlik tashkiloti nomidan auditorlik xizmatlarini ko‘rsatishga haqlidirlar. Shunday qilib, koronavirus pandemiyasi davrida auditorlik tashkilotida tegishli malakaga ega bo‘lgan auditorlarning to‘liq soni saqlanib qolinadi.

Navbatdagi malaka imtihonini o‘tkazish to‘g‘risida qaror qabul qilingach,  tegishli ma’lumotlar Moliya vazirligi va respublika auditorlar jamoat birlashmasi veb-saytlariga joylashtiriladi.

Moliya vazirligi

Axborot xizmati