O‘zbekiston Respublikasi Moliya vazirligi O‘quv markazida buyuk mutafakkir shoir, so‘z mulkining sultoni Alisher Navoiy tavalludining 581 yilligiga bag‘ishlangan “Alisher Navoiy siymosi – mangu barhayot” nomli ma’rifiy kecha tashkil etildi.

Tadbirda Vazirlar Mahkamasi huzuridagi Ma’naviyat va davlat tilini rivojlantirish masalalari departamenti mas’ul xodimi F. Hayitov hamda Moliya vaziri maslahatchisi D. Bo‘riyev tomonidan Alisher Navoiyning davlat g‘aznasini boshqarishga oid islohotlari, adolatli jamiyat barpo etish va xalq farovonligini ta’minlashga doir qarashlari tahlil qilinib, o‘zbek adabiy tili rivojiga qo‘shgan hissasi haqida ma’lumot berildi.

Shundan so‘ng, Yakkasaroy tuman madaniyat uyi qoshidagi dutorchi qizlar jamoasi tomonidan milliy kuylar chalinib, O‘zbekiston davlat drama teatri aktyorlari “Sab’ayi sayyor” spektaklidan parcha ijro etildi.

Ma’rifiy anjumanni video aloqa orqali hududiy moliya organlari xodimlari to‘g‘ridan-to‘g‘ri kuzatib borishdi.

Tadbirda qayd etilganidek, joriy yilning fevral oyida Alisher Navoiy va Zahiriddin Muhammad Bobur tavallud kunlari munosabati bilan, Moliya vazirligi huzuridagi tashkilotlar va hududiy moliya organlarida qator ma’naviy tadbirlar o‘tkazilishi rejalashtirilgan.