Barchamizga ma’lumki, mamlakatimizda o‘qituvchi va murabbiylar kuni keng nishonlanib kelinmoqda.

Shu munosabat bilan, joriy yilning 27-sentabr kuni vazirlik xodimlari va Oʻzbekistonda xizmat ko‘rsatgan yoshlar murabbiysi Erkin Komilov o‘rtasida “Ustoz va shogird an’analari” mavzusida ijodiy uchrashuv bo‘lib o‘tdi.

Shu kuni Iqtisodiyot va moliya vazirligi huzuridagi Moliya organlari hamda budjet tashkilotlarining moliya-hisob boʻlinmalari xodimlarini tayyorlash oʻquv markazida O‘zbekiston xalq yozuvchi Togʻay Murodning “Oydinda yurgan odamlar” asari asosida sahnalashtirilgan spektaklning ilk namoyishi ham oʻtkazildi. 

Spektaklni O‘zbekiston xalq artisti Erkin Komilov boshchiligidagi yosh aktyorlar ijro etishdi. Ushbu sahna ko‘rinishi tomoshabinlar xotirasida o‘chmas iz qoldirdi.

Asar qahramonlari Qoplonbek va Oymomo buyuk muhabbat bilan bir-biriga bog‘langan. Qahramonlarning butun hayot yo‘li oydinda aytilgan qo‘shiqday tarannum etiladi. Oymomoga behad xushro‘ylik bergan tabiat uni onalik baxtidan bebahra qilgan edi. Sahna asari so‘nggi nafasida onalik baxtidan bir lahza bahramand bo‘lib dunyodan ko‘z yumgan Oymomo qismati bilan yakun topadi.

Xodimlar ustoz san’atkor va teatr jamoasiga samimiy minnatdorlik bildirishdi. Ushbu ta’sirchan spektakl barcha qatnashchilar uchun manzur bo‘lib, xodimlar mazkur spektakldan ma’naviy ozuqa olishdi.